إزاي تجهّز تصميمك للطباعة عشان يطلع واضح وحلو

الطباعة الحلوة بتبدأ من ملف حلو. دي أهم النصايح عشان تصميمك يطلع على التيشيرت زي ما انت شايفه على الشاشة:

١. الجودة: كل ما أعلى أحسن

الأفضل صورة عرضها ٢٠٠٠ بيكسل أو أكتر. الصور الصغيرة أو اللي متاخدة سكرين شوت من النت بتطلع مكسّرة. الاستوديو بتاعنا بينبّهك لو الصورة جودتها قليلة.

٢. الخلفية الشفافة (PNG)

لو اللوجو على خلفية بيضا، المربع الأبيض هيتطبع على التيشيرت الأسود! ارفع PNG بخلفية شفافة، أو دوس «شيل الخلفية» في الاستوديو لو الخلفية لون واحد.

٣. التباين

الكتابة الغامقة على تيشيرت أسود مش هتبان. على الأسود استخدم ألوان فاتحة، وعلى الأبيض ألوان غامقة.

٤. حجم الكتابة

الكتابة الصغيرة أوي (زي تفاصيل رفيعة جدًا) ممكن متبانش. خلّي الكلام المهم كبير وواضح، والخطوط الرفيعة جدًا ابعد عنها.

٥. اتأكد من الإملا

راجع كل حرف — خصوصًا الأسامي والكلام العربي. إحنا بنبعتلك الموكاب على واتساب قبل الطباعة، بس عينك أهم.

٦. الحاجات اللي مبنطبعهاش

لوجوهات الأندية والماركات العالمية والشخصيات المملوكة لشركات (أنمي، كرتون…) ليها حقوق ملكية — بنطبع تصميمات أوريجينال بس، ولو محتاج فكرة الديزاينر بتاعنا يعملك واحدة. من ٦ قطع التصميم ببلاش.